漢諾威不來梅大晒冷

　　雄師上輪啱啱踢完兩場打吡戰，雲達不來梅主場贏漢堡2比0，漢諾威更巴閉，作客4比0怒炒富豪球會禾夫斯堡，今晚德甲漢諾威主場對不來梅，就好似踢完淘汰賽準決賽嘅勝方喺決賽對壘一樣，力爭北方霸主，雙方都攻強守弱，同時都處於上佳狀態，今晚放開懷抱對攻，1.62倍入球大係Oliver嘅五星推介。

　　漢諾威過去只係北方諸強嘅小弟弟，三年前仲處於門將安基去世嘅悲痛中，不過「微笑教頭」史隆卡回投改變一切，務實而樂觀嘅佢將快樂足球帶返畀呢個城市，再加上佢嘅副手，前漢諾威門將舒馬迪基喺收購球員方面取得重大成功，好似耶高蘭同艾度拿奧爾等優質鋒將都係以超值價買入，漢諾威嘅進步幅度快得驚人，今季佢哋得到匈牙利好波之人侯斯迪回巢，重新成為球隊大腦，更加如魚得水，上仗對禾堡4個入波都由佢包辦助攻，新加盟鋒將蘇拜治亦迅速着火。

　　漢諾威近5場正式賽事瘋狂咁取得22個入球，不過合共亦失咗7球，防線欠穩係佢哋爭取更上一層樓嘅最大絆腳石。

　　不來梅今季大換血，教練舒哈夫未開咧前已對呢支年輕新軍十分滿意，果然愈踢愈好，上仗雖然只贏漢堡兩球，但具威脅攻門多不勝數，若非門楣門柱同漢堡門將艾達力拒來犯，不來梅隨時可以入多3、4球，舒哈夫採用4141主攻陣式，新加盟嘅艾利亞、奇雲迪布尼、阿克柏拉同尼斯彼德臣令漢堡防線疲於奔命，今場作客一樣會照攻。兩軍近年交手慣演入球騷，尤其漢諾威主場，3比2、4比1、1比5、4比3同2比4呢啲賽果顯示，呢兩隊波都不甘寂寞，今晚又點會悶親大呢？